Ufa, 1 fevral’, Tatar-inform (Fänis Fätxullin) - Başqortstan Tatar kongressınıñ kiñäytelgän utırışı bulıp ütte. Anda kongress wäkilläre yıllıq eş planın qabul itte. Başqortstan Tatar kongressı citäkçeläre üzläreneñ 2010 yılğa eş-maqsatları turında kiñräk dairägä citkerü häm bergäläp eşlärgä cälep itü öçen, respublikadağı başqa tatar milli oyışmaları citäkçelären dä çaqırdı bu kiñäşmägä. Cämğıse 18 cämäğätçelek oyışması citäkçeläre häm aktiv äğzaları kilgän.

Berençe kön tärtibendä bu yılğa eş planın qabul itü qaralğan ide. BR Tatar kongressı Başqarma komitetı äğzaları, tege yäki bu komissiä räisläre üzläre başqaraçaq eşlär xaqında äzerlägän plannarın täqdim itte häm tikşerügä çığardı. Här çığıştan soñ täqdimnärne tikşerü häm alarğa tözätmälär häm östämälär kertü dä oyıştırıldı.

Bıyıl BR Tatar kongressı oyıştıraçaq çaralar arasında mädäni kiçälär, yubileylar, xäter häm iskä alu märäsimnäre dä baytaq qına. Şulay uq säyäsi-ictimaği çaralar da baytaq qaralğan. Alar arasında tatar tele statusı mäsäläse buyınça möräcäğätlär äzerläw, uram cıyınnarı oyıştıru, şulay uq tatar mäktäplären saqlap qaluğa qağılışlı çaralar da bar.

Şulay da iñ töp eşçänlek dairäse itep BR Tatar kongressı äğzaları bıyıl oktyabr’ ayında ütäçäk xalıq isäben aluğa äzerlekne sanıy. Bu temağa qağılışlı da baytaq çaralar küzallana.

Kongress utırışı kön tärtibendäge ikençe mäs’älä dä berençesenä quşılıp kitte. Çönki ikençe tema bulıp näq menä canisäpkä äzerlek häm anı ütkärü çorında başqarılaçaq eşlär xaqında söyläşü tora ide. Bu mäsäläne tikşerü ayıruça canlı bardı. Çığış yasawçılar da küp buldı. BR Tatar kongressı wäkillärennän tış, başqa tatar ictimaği oyışmaları citäkçeläre dä bu mäsälägä qarata üz fiker-qaraşların äytte. Cıyılış barışında här oyışma da bıyılğı xalıq isäben alu çorında üzläre başqaraçaq eşlär turında ayırım programma tözegän. Şulardan çığıp urtaq ber programma tözü häm kiñäşläşep, bergäläp eşläw kiräklege assızıqlandı.