Ufa, 8 fevral’, Tatar-inform (Fänis Fätxullin) – Çeçnya Respublikasında bulğan bäreleşlärdä Başqortstannan barğan 4 xärbi xezmätkär häläk buldı, tağın dürtese qatı yaralandı.

Bu xaqtağı xäbärne Başqortstan buyınça Eçke eşlär ministrlığı matbuğat xezmäte başlığı Ruslan Şäräfetdinow rasladı. Anıñ äytüençä, häläk buluçılar – Başqortstan Eçke eşlär ministrlığınıñ Eçke ğaskärläre maxsus otryadı xezmätkärläre. Häläk bulğan dürt keşe arasında ber ofitser, şulay uq praporşçik, serjant häm yefreytor bulğan. Şulay uq dürt xärbi xezmätkär qatı yaralar alğan.

Çeçen boyıwikları belän bäreleşlär Urıs-Martan rayonınıñ Alxazur awılı tiräsendä bula. Älegä Başqortstan xärbiläreneñ şulay küpläp häläk buluı säbäpläre açıqlanıp betmägän. “Älegä häläk buluçılarnıñ isemnären dä äytmi torabız”, – dide Ruslan Şäräfetdinow.

Çeçnyadä elek suğış barğan waqıtta da Başqortstannan baytaq militsiä xezmätkärläre häm xärbiläre ğomere özelgän ide. Ämma xäzer anda prezident Ramzan Kadırov iminlek urnaştı dip beldergän waqıtta, bu xällärneñ qabatlanuı ayıruça ayanıçlı.