23-yanvar künü İ.Gasprinskiy adına kitaphanede Milliy areketniñ faal iştirakçisi, istidatlı şair Yuriy Osmanovnıñ “Qırım – menim vatanım” adlı şiirler kitabınıñ taqdimi olıp keçti. Kitaphaneniñ oquv zalı qırımtatar milliy halq areketi iştirakçileri, Yu.Osmanovnıñ dostları, soy-aqrabaları, deviriy matbuat hadimlerinen rıqma-rıq toldı.

Tedbirni kitaphaneniñ müdiri Ayder Emirov açtı, hadimi Lilâ Qadırova alıp bardı. İlk söz Milliy areket iştirakçisi Gömer Bayevge berildi. O Yu.Osmanovnıñ ömüri ve faaliyeti aqqında ikâye eter eken, cümleden, böyle dedi:
-Yuriy Osmanov 1941 senesi Kuybışev rayonınıñ Büyük-Qaralez köyünde dünyağa keldi. O qırımtatar milliy areketi esasçılarınıñ biri Bekir Osmanovnıñ oğludır. Balalıqtan halqnı vatanğa qaytaruv ğayesini özüne siñdirdi. 1958 senesi mektepni bitirgen Yura Moskvadaki Bauman adına universitetke kirip oquy.

Bitirgen soñ Dubna şeerindeki yader tetqiqatı institutında çalışmağa başlay. Studentlik devirinde milliy areket işine faal kirişe em de İ.Gasprinskiyniñ mirasını ögrene. 1968 senesi 2,5 yılğa qapala. Azat olğan soñ, 1970 senesi Sumgaitte cam zavodınıñ leyiha bölüginde işley, 1972 senesi Ferğanağa qayta ve qısqa müddet “Giprovodhoz” institutınıñ leyiha bölüginde çalışa.

Öz zenaatını sevgenine, icadiy yanaşqanına baqmadan, onıñ ömüriniñ esas manası halqınıñ milliy aq-uquqını qorçalav edi. Şu sebepten milliy areketteki işini faalleştire, neticede, o daimiy sürette KGBniñ nezareti astında buluna ve oña qarşı malümatlar toplaylar, tintüvler yapalar.

Yuriy Osmanov 1982 senesi kene apske alına. 1983 senesi üç yılğa qapatıla. Müddeti bitmesine üç kün qalğanda, kene mahkeme eteler ve onı ruhiy hasta dep belgileyler. 1987 senesi Ferğana şeerindeki “psihuşka”ğa yollaylar. Onı yedi yıldan soñ azat eteler.

Yu.Osmanovnı 1989 senesi qırımtatar meseleleri boyunca SSSR Devlet komissiyasına aza eteler. Vatanğa köçken soñ ise onı Surgün olunğan halqlarnıñ işleri boyunca Komitetke idare etici, 1991 senesi ise reis olaraq tayinleyler.1991 senesi küzde “Areket” gazetine esas qoya ve ömüriniñ soñki kününe qadar muarriri ola. Yuriy Osmanov 1993 senesi 6-noyabrde belli olmağan vaziyette öldürile.

Yuriy Osmanov öz halqına ve onıñ kelecegine işana edi. O halqınıñ aq-uquqı üzerinde küreşmeknen bir sırada öz duyğularını, işançını, ümüt ve arzularını şiirlerde ifadeledi. Yuriy Osmanovnıñ ömüri halqınen sıqı bağlı edi. Onıñ icadında grajdan ve felsefiy şiirleri esas yerni tuta. Bir sıra eserleri tercimeiy alını tasvirley. Bu cıyıntıqnıñ dünya yüzü körmesi küreşçi-şairniñ hatırasını aydınlata.

Tedbirde safdaşları Halit Bektaş, Refat Seydamet, Bilâl Seitablayev, Seitâğya Bilâlov, Murahas Nurfet, Lenura Mercan qızı, şairler Riza Fazıl, Ablâziz Veliyev, “Maarifçi” birleşmesi adından Seyran Üseinov, “Poluostrov” gazetiniñ muarriri Vasvi Abduraimov, Bütünukrain informatsion merkeziniñ reisi Vladimir Yermakov ve digerleri çıqışta bulundılar. Olar Yu.Osmanovnıñ yapqan işleri, körüşüvleri em de şiirlerinden alğan tesirleri aqqında ikâye ettiler.

Milliy akademik teatrimizniñ artisti Fatma Asanova, QMP universitetiniñ studenti Leniyara Abdurahmanova müellifniñ şiirlerini oqudılar. Belli yırcı Rustem Memetov vatanperver türkülerni icra etip, tedbirni yaraştırdı. Tedbirniñ soñunda Yu.Osmanovnıñ refiqası Ayşe hanım kelgenlerge teşekkür bildirdi ve Yu.Osmanovnıñ evlâtlarına, ömür arqadaşına bağışlap yazğan şiirlerini oqudı. Subet ve hatırlavlar qave sofrası başında devam etti.

Qaynaq: Naciye AMET, Kırım gazeti