Qazan, 30 dekabr 2008, “Tatar-inform” – Çiläbe ölkäse Miass şähärendä yäşäp icat itüçe millättäşebez şağir häm yazuçı Marat Şahiew Rossiä Yazuçılar berlegenä äğza itep qabul itelde. Äğzalıq biletın kiçä aña ölkä yazuçılar oyışması citäkçese Anatoliy Belozersev tapşırdı, dip xäbär itä “Uralpress”.

Marat Şahiew bügenge köndä däwlät arxitektura küzätçelege inspeksiäsendä eşli. Ul rus telendä şiğırlär häm proza äsärläre yaza. “YÄ – miaskit”, “Apriori”, “Sledı na peske”, “No eto je rodnaya storona” h.b. isemdäge kitaplar avtorı. Soñğı yıllarda Marat Şahiew üzeneñ ostazı, Miass yazuçısı Mixail Laptewnıñ şiğırlär häm proza äsärlärennän torğan cıyıntığın basmağa äzerläp, bastırıp çığardı. Marat Şahiew mädäniätne üsterü ölkäsendäge qazanışları öçen Miass deputatlar Sovetı premiäse laureatı buldı.

Xäzerge köndä Marat Şahiew fantastik elementlarnı üz eçenä alğan bügenge kön tormışı, Rossiä cämäğätçelegendäge qapma-qarşılıqlar turındağı ütken syujetlı romanı östendä eşli.