Uzğan yäkşämbedä Yäşel Üzändä Sabantuy bäyräme görläp ütte. Bıyıl bäyrämne tamaşa qılırğa kilüçelär arasında TR Däwlät Sovetı Räise urınbasarı Aleksandr Gusev, TR ekologiä häm tabiği resurslar ministrı Äğläm Sadretdinov, TR yustitsiä ministrı Midxät Kormanov, RF Däwlät Duması deputatı Ayrat Xäyrullin, Rossiäneñ küp kenä töbäkläre, şul isäptän Mäskäwdän maqtawlı qunaqlar bar ide.

Oyıştıruçılar şähärdä, awıl cirleklärendä yäşäwçelär häm awıl xucalığı predpriätielärendä eşläwçelär öçen çın bäyräm äzerlägän ide. Töp mäydanğa kerü yulında qunaqlarnı “Yäşel Üzän arbatı” qarşı aldı. Anda rässamnar häm şarj ostalarınıñ galereyası urnaştırılğan ide.

Teatral’läşterelgän tamaşada Yäşel Üzän häm Qazannıñ icat kollektivları, şulay uq rayonnıñ sport klubları qatnaştı. Bäyräm qunaqları Tatarstan Respbulikası sänğat ostalarınıñ çığışın tamaşa qıldı. Teatral’läşterelgän tamaşada barlığı 800 dän artıq keşe qatnaştı, alar arasında “Sozvezdie–Yoldızlıq–2009” festivalendä gran–pri yaulağan “Orfey” vokal’–xoreografiä kollektivı da bar ide.

Bäyräm qunaqlarına Tatarstan Respublikası Prezidentı Mintimer Şäymiew häm RF Däwlät Duması Räise urınbasarı Oleg Morozownıñ qotlaw telegrammaların uqıdılar. Şunnan soñ şähärdä yäşäwçelär häm bäyräm qunaqlarına Yäşel Üzän munitsipal’ rayonı başlığı Radik Xäsänow möräcäğät itte. Ul awıl xezmätçännären yazğı çäçüneñ tögällänüe belän täbrik itte häm 2009 yıl uñışı öçen yaxşı nigez salınuın assızıqladı. Awıl xucalığı proizvodstvosı aldınğılarına aqçalata premiälär tapşırıldı, dip xäbär itä Yäşel Üzän munitsipal’ rayonı matbuğat xezmäte.

Barlıq yarışlarda ciñüçelärne büläkläw şulay uq qimmätle prizlar tapşıru belän aralaşıp bardı. Yäşel Üzän rayonı Veterannar sovetı täqdime belän bıyıl Sabantuynıñ absolyut batırı isemen alu öçen köräştä barı tik rayonda yäşäwçe köräşçelär genä qatnaştı. Qazan finans akademiäse studentı Rinat Xäyretdinow baş batır qaldı. Ciñüçegä ciñel avtomobil’ häm täkä tapşırıldı.

Qaynaq: TatarInform