TR Prem’yer–ministrı Röstäm Miñnexanow citäkçelegendäge Tatarstan Respublikası räsmi delegatsiäse ike könlek (14–15 iyun’) eş vizitı belän Törkmänstanda. Bu xaqta TR Ministrlar Kabinetınıñ matbuğat xezmäte xäbär itä.

Tatarstan delegatsiäseneñ älege ilgä säfäreneñ maqsatı – Törkmänstannıñ “Avaza” milli turistlıq zonası şifaxanä–kurort obyektlarınıñ berençe çiratın açuda qatnaşu. Ul bügen irtän tantanalı töstä açıldı – Kaspiy diñgeze buyında zamança “Watançı”, “Çarlaq” häm “Xazına” kunakxanäläre faydalanuğa tapşırıldı.

TR Prem’yer–ministrınıñ tışqı iqtisadi eşçänlek buyınça kiñäşçese İskändär Möflixanow xäbär itkänçä, tantanalı çaralardan soñ “Watançı” kunakxanäsendä “Avaza” milli turistlıq zonası üseşenä investitsiä kertüdä qızıqsınu beldergän çit il kompaniäläreneñ yaña proektları häm täqdimnäre täqdir itelde.

Biredä akvaparklar, plyajlar tözü, yal zonasın alğa taba kiñäytü küzdä totıla. Bügenge köndä “Avaza” turistlıq zonasına investitsiälärneñ küläme 2 milliardtan artıq AQŞ dolları täşkil itä.

“Avaza” territoriäsendä investitsiä proektlarınıñ bersen Tatarstan Respublikası häm qayber tözeleş kompaniäläre (“QER–Xolding” idaräçe kompaniäse) ğamälgä aşıraçaq. İskändär Möflixanow xäbär itkänçä, älege proekt sport–sälämätländerü çañğı kompleksın tözüne üz eçenä ala.

Bügen Tatarstan Prem’yer–ministrı Röstäm Miñnexanow Törkmänstan Prezidentı Ğurbanğulı Berdımöxämmädow belän oçraşa. Könneñ ikençe yartısında Röstäm Miñnexanow citäkçelegendäge Tatarstan Respublikası delegatsiäse Qazanğa qaytaçaq.

Qaynaq: TatarInform