Ufa, 9 noyabr’, Tatar-inform (Fänis Fätxullin) – Başqortstan tatar milli oyışmaları kiñäşmä ütkärde. Anda aldağı canisäpkä äzerlek turında irtägä Ufada ütäçäk söyläşü xaqında fiker alıştılar.

Mäğlüm ki, Rossiädäge iqtisadıy töşenkelekkä sıltanıp, 2010 yılda ütärgä tieşle xalıq isäben alunı 2013 yılğa küçerü turında qarar itelgän ide. Ämma soñğı könnärdä bu täñgäldä tağın ber yañalıq buldı. İmeş, aqça tabıla häm canisäp bilgelängän waqıtında, yäğni kiläse yılda uq, oyıştırılaçaq.

Xalıq isäben alu kiçekterelä digännän soñ, Başqortstan tatar milli xäräkätenä qarağan oyışmalar aña äzerlek eşlären süreldergän ide. Ämma äle canisäp aldağı yılda uq uzaçaq digäç, respubliqa tatar cämäğätçelege qabat bu eşkä citdi äzerlek alıp baru kiräklegen iskärtte. Şuşı uñaydan irtägä, näq menä şuşı temanı ğına tikşerü öçen, tatar milli oyışmaları zur kiñäşmä ütkärergä kileşte. Bu xaqta söyläşü yunäleşlären täğäyenläw öçen, tatar oyışmaları citäkçeläre häm qayber ğalimnär qısqa ğına oçraşu oyıştırıp aldı.

Söyläşüdä töp süzne tanılğan tatar ğalime, etnologiä häm etnosäyasät belgeçe İldar Gabdrafıyykov aldı. Anıñ süzlärençä, Başqortstandağı här xalıqnıñ cämäğätçelek oyışmaları bu möhim kampaniädä üz tırışlığın salaçaq. Tatar oyışmaları da yoqlap yatarğa tieş tügel, di ul.

Tatar oyışmaları häm tatar ğalimnäre Başqortstandağı demografik wäzğıät häm qaysı xalıqnıñ çınlıqta küpme buluı turında cämäğätçelekkä mäğlümat birep torırğa tieş. Üzebezneñ gäzitne çığaru kiräk, şuşı temağa fänni konferensiälär dä oyıştıru zıyan itmäs, di İldar äfände. Anıñ süzlärençä, xalıq isäben alunı 2010 yılda uq ütkärü otışlıraq bula.

Başqortstanda xalıq isäben aluğa äzerlek räsmi xaqimiätlär tarafınnan da daimi alıp barıla. Canisäp eşe belän yöriäçäk keşelär maxsus uqu-künekmälär ütä. Bu kampaniägä, nigezdä, 2002 yıldağı şuşı uq eştä täcribä tuplağan keşelärne cälep itäçäklär.