Ufa, 17 noyabr’, Tatar-inform (Fänis Fätxullin) – Kiläse yılnıñ iyun’ ayında Ufada Bötendönya Başqortlarınıñ 3nçe qorıltayı ütäçäk.

Bu xaqta Başqortstan prezidentı Mortaza Räximownıñ färmanı dönya kürde. Çirattağı zur cıyında Bötendönya Başqort qorıltayınıñ uzğan çordağı eşenä yomğaq yasalaçaq häm aldağı yıllarğa yaña burıçlar bilgelänäçäk. Şulay uq Bötendönya Başqortları qorıltayınıñ yaña Başqarma komitetı da saylanaçaq.

Äle Başqortstan Xökümätenä başqort qorıltayına äzerlekne başlaw, anıñ finans çığımnarın bilgeläw häm başqa oyıştıru eşläre yöklätelä. Qorıltayğa äzerlekne Başqortstan prezidentı xaqimiäte idaräse härdaim kontrol’dä totaçaq, dip äytelä Mortaza Räximownıñ färmanında.

Şul uq waqıtta älegä Ufada kiläse yılda ütäçäk Başqortstan tatarları qorıltayınıñ waqıtı täğäyenlänmägän. Anı mart-aprel’ aylarında ütkärü turında süzlär yöri. Bu xaqta Başqortstan prezidentı yañaraq Ufağa kilgän Bötendönya Tatar kongressı Başqarma komitetı räise Rinat Zakirov belän oçraşuda kileşkän ide. Ul qorıltayda Başqortstannıñ tağın ber Tatar kongressın tözü küzdä totıla. Äle Başqortstanda Tatar kongressı eşläp kilä inde. Anıñ soñğı qorıltayı 2007 yılnıñ dekabrendä ütkän ide. Kiläse qorıltay, Kongressnıñ nizamnamäsenä yaraşlı, 2012 yılda ğına ütärgä tieş. Şulay itep kiläse yıldan Başqortstanda ike Tatar kongressı eşlärgä mömkin.