Ufa, 30 noyabr’, Tatar-inform (Fänis Fätxullin) - Qazannıñ N. Cihanow isemendäge däwlät konservatoriäse sänğat ostaları Başqortstanğa icat säfärenä kilde.

Alar Ufağa Cäwdät Fäyzineñ tuuına 100 yıl tuluğa bağışlap quyılğan “Başmağım” muzıykal’ komediäse belän “Tatariqa” orkestrı konsertın alıp kilde. Tatarstannıñ atqazanğan sänğat eşleklese, professor R. A. Xalitov citäklägän “Tatariqa” orkestrı, küp kenä çit illärgä yörsä dä, anıñ Ufağa berençe tapqır kilüe.Kiçä kiç Qazan qunaqları Ufa däwlät sänğat akademiäseneñ konsertlar zalında çığış yasadı. Ufağa alıp kilgän konsert programmasında alar Qazan, Qırım, Seber, Ästerxan tatarlarınıñ xalıq köylären dä, zamança tatar muzıykasın da, Latin Amerikası, şärıq, rus häm Yevropa klassikasın da yañğırattı.

Bügen Qazan konservatoriäse talant iäläre Ufa “Nur” tatar däwlät drama teatrınıñ zur zalında tamaşaçılarğa “Başmağım” muzıykal’ komediäsen täqdim itä. Biletlar aldan uq satılıp betkän ide inde.

“Başmağım”da Kärim bay rolen Artur İslamov, Särwärne Aygöl Xäyri, ä inde yäş yeget Ğalimcannı talantlı yaktaşıbız, Büzdäk rayonı tatarları danın arttırğan Filüs Qahirow başqara.