Ufa, 28 ğinwar, Tatar-inform (Fänis Fätxullin) – Başqortstandağı talantlı tatar cırçısı Rişat Galixanov yaña yılda üz tamaşaçılarına zur büläk äzerläde.

“Qoşlar moñın salıp cırlarğa” dip isemlängän ör-yaña programmasın äzerläp respubliqa rayonnarında kürsätä başladı ul. Şuşı tamaşanı Rişat Galixanov, uzğan könnärdä, üzeneñ icattaş dusları belän bergäläp, Mäläwez, Salawat şähärlärendä häm İleş rayonında täqdim itte. Äle gastrol’lär başqa rayonnarda da däwam itäçäk. Ä 12-13 fevral’ könnärendä Rişat Galixanov yaña tamaşanı Ufadağı UZEMİK mädäniät sarayında millättäşlärebez xozurına çığaraçaq.

Rişat Galixanov üzeneñ şuşı ayırım eşlägän zur konsertında küp çığışların tatar xalıq cırlarına bağışlağan. Şulay uq kompozitorlar yazğan yaña, matur cırlar da bar repertuarda. Şulay da Rişat Galixanovnıñ köçle häm moñlı tawışınıñ bar mömkinlekläre näq menä tatar xalıq cırlarında tulı açıla. Bu yulı da moña şahit bulır tamaşaçılar. Cırlı-moñlı kiçäne bik osta itep Ufa “Nur” tatar däwlät drama teatrınıñ äydäwçe akterı, Başqortstannıñ atqazanğan artistı Mäxmüt Fatıyyxov alıp bara.

Yaña mädäni programması belän yazğı aylarda respublikadan çittä yäşäwçe millättäşlärebez yanına da yış yörergä uy-niätlär qora talantlı cırçıbız.